অসমীয়া কবিতা (জীৱন )

                     

                                               জীৱন  

                   কবি ঃ আনন্দচন্দ্ৰ বৰুৱা

আজি এই গোধূলিৰ আৰতিৰ বেলা

প্ৰাণৰ দেৱতা মোৰ আহিছে ধিয়াই

নেজানো কি পূজা পাই দিব বৰ দান ,

শুনাব কি সঙ্গীতৰ প্ৰাণময় টান?

               বহু কথা আছে মোৰ 

                                    আছে বহু গান,

                যৌৱন জ্বলে মোৰ

                                ডাকি আছে বান !

চেতন জড়ৰ ভেদ নেজানো সমূলি

সকলোতে নিমন্ত্ৰণ লিখা আছে মোৰ ,

বিশ্ব-ব্যাপী মিলনৰ মহা উৎসৱত

জানিছোঁ গীতৰ ধ্বনি নপৰিব ওৰ !

              লাজ অপমান সকলো সমান,

                           উলটি নেঁচাও আজি

              প্ৰাণৰ দেৱতা আনিছে বাৰতা_

                              নৱীন সাজেৰে সাজি !

উঠিছে নামিছে                 নিতে  গৰজিছে

                কল্লোল সম হিল্লোল যাৰ ,

আজি গোধূলিৰ               ধূলিৰ মাজত

             পাইছোঁ লাগাল সেই দেৱতাৰ !

লাঞ্ছনা মোৰ সাৰ্থক হব - ঘৃণাই ধুৱাব ভৰি

আহিছে যেতিয়া প্ৰাণ দেৱতা দুহাতে আশিখ ধৰি !