অসমীয়া কবিতা ( বসন্ত বাহাৰ )

                          বসন্ত বাহাৰ

কবি ঃ আনন্দচন্দ্ৰ বৰুৱা

ৰাং ঢালী  বাসন্তীৰ ৰং দোলনত

         কোন কৃষ্ণ নাচে অজি চ 'তালি বনত,

ফাগু সনা অৰুণৰ প্ৰেম কিৰণত

           ষোড়শী গোপিনী কিয় লাজে অবনত ?

           মদনগোপাল কেনি লুকাল আজি

           মনমোহা নিকুঞ্জৰ কুঞ্জৰি সাজি ?

কেনি গ'ল যমুনাৰ উজান লহৰ

           ঝাঁও বন কেনি বাৰু পৰিল মাটিত,

কাৰ আজি সুকোমল আঙুলিত লাগি

           পৰাণ উতলা সুৰ বাজিছে বাঁহীত ?

ঢউ খেলি বতাহত আহি আছে কাৰ

            ৰঙা ৰঙা ফাকুছলি কুঙ্কুম গাৰ ?

কাৰ বাৰু আবেশৰ পৰশন লাগি

            শিমলু  পলাশে দিয়ে প্ৰেম উপহাৰ ।

ৰঙা ৰঙা ফাকুছলি কুঙ্কুম গাৰ ।।

বিশ্বব্যাপী প্ৰেমিকৰ প্ৰেমৰ চুম্বন

           বসন্তৰ বনে বনে বিয়পিছে আজি ,

গছে পাতে বিৰিঙিছে আবেগৰ বোল --

           অস্ফুট পৰশত উঠিছে ৰাজি !

           বসন্তৰ বনে বনে মন - গীতি বাজি ।।